जनताको आँगनमै आशा बोकेर पुगेका खड्ग फागोको अभियानले मतदाताको मनमा नयाँ भरोसाको बीउ रोप्दै

NayaNaya Khabar
50 दिन अगाडि

जनताको आँगनमै आशा बोकेर पुगेका खड्ग फागोको अभियानले मतदाताको मनमा नयाँ भरोसाको बीउ रोप्दै
उर्लाबारी, १३ फागुन । चुनावी मौसमसँगै गाउँका गल्ली–गल्लीमा चहलपहल बढेको छ । घरआँगनमा भेला भएका स्थानीयका आँखामा आशा, अपेक्षा र परिवर्तनको चाहना स्पष्ट देखिन्छ । यही भावना बोकेर आगामी फागुन–२१ गते हुने प्रतिनिधिसभा निर्वाचनलाई लक्षित गर्दै खड्ग फागो यतिबेला मोरङ क्षेत्र नम्बर–१ का गाउँ–गाउँमा सक्रिय रूपमा घरदैलो अभियानमा जुटेका छन् ।

नेपाली कांग्रेस का तर्फबाट प्रतिनिधिसभा सदस्य पदका उम्मेदवार रहेका फागोले चुनावी प्रचारलाई औपचारिक सभामा मात्र सीमित नराखी मतदाताको घरआँगनसम्म पुग्ने रणनीति अपनाएका छन् । बुधबार उनले मिक्लाजुङ गाउँपालिका वडा नम्बर १,४ र ५ का विभिन्न टोल–बस्तीमा पुगेर स्थानीयसँग प्रत्यक्ष संवाद गरे । घरदैलो कार्यक्रममार्फत नागरिकका दैनिक जीवनसँग जोडिएका समस्या, अपेक्षा र सुझावहरू उनले ध्यानपूर्वक सुने ।

स्थानीयवासीहरूले गुणस्तरीय शिक्षा र स्वास्थ्य सेवाको पहुँच अझै कमजोर रहेको, सडक पूर्वाधार अभावका कारण दैनिक जीवन कष्टकर बनेको तथा युवाहरू रोजगारीको खोजीमा विदेशिन बाध्य भएको गुनासा खुलेर राखेका थिए । कृषकहरूले कृषि उत्पादनको उचित बजारीकरण, सिँचाइ सुविधा विस्तार र आधुनिक प्रविधिको आवश्यकता औँल्याए । महिला समूहहरूले स्वरोजगार कार्यक्रम, सीपमूलक तालिम र स्वास्थ्य सेवाको सहज पहुँच विस्तार गर्न माग गरे भने युवाहरूले खेलकुद पूर्वाधार, रोजगारी सिर्जना र प्राविधिक शिक्षामा लगानी बढाउनुपर्ने सुझाव दिए ।

मतदाताका कुरा ध्यानपूर्वक सुन्दै फागोले जनताको आवश्यकता र प्राथमिकतालाई केन्द्रमा राखेर योजनाबद्ध विकास कार्यक्रम अघि बढाउने प्रतिबद्धता व्यक्त गरे । विकासलाई नारामा सीमित नराखी व्यवहारमा कार्यान्वयन गर्ने आफ्नो लक्ष्य रहेको उनको भनाइ थियो । कृषि, पर्यटन, साना उद्योग र उद्यमशीलतालाई जोडेर स्थानीय अर्थतन्त्र सबल बनाउने तथा रोजगारी सिर्जनालाई प्राथमिकतामा राख्ने योजना उनले प्रस्तुत गरे ।

घरदैलो कार्यक्रमका क्रममा स्थानीयवासीहरूले फागोलाई युवा, ऊर्जाशील र विकासप्रेमी नेताका रूपमा चित्रण गरेका छन् । लामो समयदेखि समाधान हुन नसकेका समस्या समाधानका लागि नयाँ सोच र सक्रिय नेतृत्व आवश्यक रहेको उनीहरूको धारणा छ । क्षेत्रका समस्या नजिकबाट बुझेको नेतृत्व आए सकारात्मक परिवर्तन सम्भव हुने विश्वास स्थानीयले व्यक्त गरेका छन् ।

अभियानमा पार्टीका स्थानीय नेता, कार्यकर्ता र समर्थकहरूको उल्लेख्य सहभागिता देखिएको छ । प्रत्यक्ष संवादलाई प्राथमिकता दिँदै अघि बढाइएको अभियानले मतदातासँग विश्वासको सेतु निर्माण गरेको स्थानीय नेतृत्वको दाबी छ ।

घरदैलोमार्फत जनतासँग सिधा संवाद गर्दै अघि बढिरहेको फागोको अभियानले मोरङ–१ मा चुनावी माहोललाई थप सक्रिय बनाएको छ । जनताको दुःख, संघर्ष र सपनालाई नजिकबाट महसुस गर्दै अघि बढ्ने शैलीले उनको अभियानलाई भावनात्मक र जनमुखी बनाएको स्थानीयहरू बताउँछन् । आगामी निर्वाचनमा जनताको विश्वास कसको पक्षमा जाने भन्ने चासो बढिरहेका बेला, घरआँगनमै पुगेर जनताको आशिर्वाद लिदै प्रतिद्धता गरीरहेका फागोको अभियानले मतदाताको मनमा नयाँ भरोसाको बीउ रोपिरहेको अनुभूति गरिएको स्थानियहरु बताउछन ।